Translate

Wednesday, May 27, 2009

لانقنك...!

حصيلة عشرة -بكسر العين- سبع شهور مع الشراقة
.......
شرقاوية- غرباوية
نحن - حني
نابيدي - أني
كنك - خيرك
بكل بكسر الباء والكاف - بكل بضم الباء والكاف
واجد - هلبا
عالي واطي - زنقي دحدح
هرجة - دوشة
حمو - نو
مخربطة - مكعفصة
بكرة - غضوة
مجاش - مازال ماجش أوقاعدمجاش
مرايف - مستاحش
مرايف واحدة من الكلمات الي مش عادية بكل
نركب عليك - نبصر عليك
ليش - علاش
شوري - ليا
يان علي - حي عليا
ياحليلك - ياسعدودك أو صحا ليدك

سراق - خناب
حولي - خروف
بوشبو- زقرلو

صبي - أوقف
عدي - امشي
بحث - شوف أو اشبح
يزقب - ينقز
ارجي - استني
شيل - قيم
قمعزي - قعمزي
تبرم - تلف
عزقتها - لوحتها
دز - ابعث
يباوع - يطلع لبرا بش يشوف
نرطن - ندوي بلهجة غير مفهومة
نبص- انفرمط
يعوكر- يلعوص
لاورا - لتالي
بنة - ريحة أو صنة
.
بوتاس - واركينة
كباية - طاسة
كاس - مالقي
حكية - حكة
ابريق - براد
بكرج - سزوة أو بكرج
شكارة - برزة أو كيسة أو شكارة
طفايا - طبلة
.
الوكال- الماكلة
تن - طن
نص - نفص
مكرونة جارية - مكرونة مبكبكة
عصبان شمس - عصبان مقدد
قازوزة - مشروب
مقطع - رشدة برمة
بطيخ - قلعاوي
ماندلينا - الليم الكيني أو اليوسيفي
برتقال - ليم
ليم - ليم عصري
بكيوة - قرعة حمراء
بشكوط - بشكطي
الفحم - بياض
.
نقرم - ننتش
يطرش- يرجع أو يرد
.
دبش - حوايج
قبالي - صندل
صبات - شبشب
كاويش - سبيدرو
كراع - رجل
جمة - قصة
مساكة - توكة
روب - قفطان الحوش
سير - سبتة
.
عقد - خناق
نبيلة - سوار
دندونة - خرصة
.
شمسية - سحابة أو مظلة
بنينة - بيرو
قلم - لابس أو قلم
.
بطاح - طانطا
قلع - عكارية
فريتشا- فليتشا
.
شبردق - سياج
المارشة - شرشور
القزاز - مرش
سيمسيمة - المرشة الصغيرة
المادة - المرشبيدي
سالطو - مطب
عمود - بالو
حيطة - رشادة
ساس - حيط
.
باتي - بوي
العويل - الصغار
جتي - حناي أو جداي
متزوزة - متزوجة
سمح - اقنين
بلبول- سحنون
متبلد- بليد
راجل صامت - راجل بارد

وأخيرا وليس آخرا الكلمة التي خشت في خاطري ولم أجد لها بديل غرباوي
.
...لانقنك
.
لانقنك يا أ.أ. لشهلولية
:)
الي عنده مايضيف يتفضل ، الموضوع قابل للتعديل والاضافة..

26 comments:

Nasimlibya said...

نلقانك ماشاء الله قاموس


تسلمي والله غيرتيلي جوي واني كل منقرا نتفكر ونبتسم ونقول ايه صح و هدي ايه في كلمات طبعا جدد عليا وكلمات نعرفهم


بس ع ليش وعلاش
منعرفش اني نستعمل في الاتنين واني غرباوبية غرباوية ومعمري سمعت ليش شرقاوية هدي جديدة عليا


بس مشكورة جدا البوست حلو وليه رونق خاص يسلمو

Gheriani said...

الظاهر لم يسألك أحد عن الواشون و الا كنت أدرجت الكلمة و هى تعنى الاقارب من الدرجة الاولى و الثانية - حسب فهمى؟
موفقة انشاء الله

may said...

السلام عليكم

لا نقنك ابدعتى

يانا على يا باتى

لا بجد تحفة

قاموس متحرك

تدوينتك هذى حتخلينى كل واحد شرقاوى يكلمنى نرجعلها طول (( مرجع ))

ما شاء الله

ميوووش

وخيتك

Nasimlibya said...

عطيب = منحوس

هههه تفكرتها

كل متجي ف بالي كلمة حنرجع

فكرتيني زمان في بنات معانا بالثانوي من الشرق

فنعلقو علي كنك فنردو مكنيش زي خيرك مخيرنيش فتقعد صديقتنا تضحك وتقول بتديرو لهجة مكس جديد

فترد لا مكني شئ مش مكنيش

زي مقتلك اي حاجة نتفكرها حنرجع

PH said...

Wow what a great post, really cool and funny collection, I only have one to add, that is :

لاهاية = زلباحة

( spelling is probably wrong but it's slang so 3adi ).

Got some comments on the ones you posted too :

1-
نابيدي - أني

نابيدي is only used in the green mountains not in the plateau of barqa we say انا.

2-
حمو - نو

نو ( from what i know ) in the green mountains means cold so they use it but not for the same meaning.

3-
بحث - شوف أو اشبح

think it is بحت.

4-
قازوزة - مشروب
مشروب غازي

5-
جمة - قصة

isn't قصة a hair cut ? جمة is like the front of the hair the part that covers your forehead.... you know the part girls leave hanging out :P.

6-
بنينة - بيرو
we use both but بنينة is more common .

7-

بلبول- سحنون
we have another word, wouldn't advise you to use it though :p
مشلاط

8-
راجل صامت

it's سامط which means he need more salt to taste good or be acceptable :P.

What is it you were studying again ? I see the library can encourage creativity eh ?

salaam and thanks for the laugh

Brave Heart said...

هذا احسن بوست نقراه من فترة طويله بلكل
الكلمات الى نبى انعلق عليهن علق عليه ph
لكن بجد بجد من غير عنصريه لهجه بنغازى خير :p
زمان كنت نستغرب نين واحد يقول قاعد ماجاش ونفكر كيف الواحد قاعد ومش قاعد فى نفس الوقت
لانقانك زيدينا كلمات اخرى

Meme said...

مش عادي الموضوع
تعرفي ما كنتش نحساب للدرجه هادي فيه فرق كنت نحساب مجرد كلمات بسيطه تختلف و اللحن اللي عندهم هو هدا بس الفرق
هلبه كلمات ماكنتش نعرفهم

10x

Enlightened Spirit said...

Nasimlibya...
بارك الله فيك
كويس انش اء الله ديما بسمتك مرسومة ومضوية

والله مش عارفة نا بس صديقتى تقول ليش مش علاش
والله اعلم.

Gheriani...
لا هادي محدش قالها قدامي
منكم نسنفيد
شكرا علي المرور :)

may...
وعليكم السلام ميوش
قاموس :) لا مش لهالدرجة
بس كل مانسمع كلمة ندونها لين تجمع هذا الكم الهائل
تفضلى في أي وقت.

Nasimlibya...
هاهاها حلوة هادي كني ومكنيش بس تعرفي توا صاحبتي سألتها وقالتلي ايه نقولو مكنيش عادي يعني مش غلط .
عطيب ومنحوس جديدة عليا
شكرا عالمعلومة
وتفضلي في أي وقت
أصلا الموضوع راح يثرى بتعليقاتكم.

PH...
Thank for the word that u added, I think the spelling is completely right.
Regarding point 1, 2 , and 3. I have nothing to comment about.
but for point 4:
We call المشروب الغازي just مشروب
because if it is not غازي we call it عصير.
So it is either مشروب or عصير .
Regarding ur 5th point, I need to use arabic here:
القصة بضم القاف هيا نفسها الجمة حسب ماأنت شرحتها , بس القصة الي أنت قصدتها تكون بفتح القاف وليس بضمها.
point 6: no comment.
Point 7 : why I shouldn't use the word مشلاط ?
point 8: yeah we use this same word just for food not for people, but u there at the east side have creativity in using it for people :).

I am studying the same thing which make u sit down and analyze the post to come up with these notes :P

Thanx for passing by, my page miss ur comments.

Brave Heart...
توا لاش هكي العنصرية هادي ، ماهو كنا كويسين .. لكل لهجة جمالها..
وكل لهجة فيها لقطات مضحكة.
وهذا المطلوب بش نلقوا مانعلقوا علي بعضنا.
لانقنك صدقت

Meme...
شفتي ميمي ... حتى انا نجمع فيهم بالجو بعدين تفاجأت بالكم الهائل قلت خل نحطه الموضوع.. قبل مايولي جريدة متنقراش ،ونخلي الاضافات من الزوار.
نورتيني برزيارتك :)

S.S.Ali said...

السلام عليكم

بوست رائع و اعذريني على التاخير اللي كالعادة اصبح جزء مني هههههههه...

جميلة الفكرة و فعلا كم هائل من الاختلاف في المفردات ولكن فيه شى تاني هو المطبخ يعني عرب الشرق عندهم اسلوب تاني في الطبخ ( التطيب بالك ليها مرادف بالشرقاوي حتى هادي ) غيرنا احنا عرب الغرب بس في النهاية جميل التنوع و فعلا بوست اكتر من رائع و في نفس الوقت نادر شوية لان تعودنا عالبوستات بالانجليزي

تحية ليك و بالتوفيق يارب

Benghazi Citizen said...

I couldn't help but smiling..
Great post indeed ,i enjoyed it very much...
Any way:
شالجو؟ و كيف الوشون؟
ههههه
Be well dear friend
Till next time
see u

Motherland said...

قاموس شرقاوى -غرباوى .....موضوع جميل وثاريته الغربة هى الى تخليك تعرف بلادك...ثاريته تعنى لاجل ذلك حدث ...حطيها فى القاموس ....
هو فى كلمات واجد فى لهجة طرابلس من اصل ايطالى لان الطليان استوطنو فى جو دافى فى طرابلس لذلك انتشرت كلماتهم اكثر من بنغازى مثل ...سبيدرو وبالو وكروانا وكريولا وكاشيك وكوجينة وياغورت وكلمة جيرو تصدقى انها ايطالية .

Best regardS

dusk till dawn said...

hi sis.
what a post , we just could not stop laughing , one of the best , u can see ur having fun and blending great with ur libyan families , with the help of my wife we add 1: لانقنك ــ معناها بالحق
2: قب ــ جـف
3: عدالة ــ عالة
4: الرمى ـــ الحنة الصغيرة
5: الحنة ــــ النجمة
6: اصلع ــــ اقرع
7: العارضة ـــ بورطا
8: كسكسو ـــ كسكسى
9: شرمولة ـــ سلاطة
10: ورشة ــــ حبة
correct us if we are wrong , thanx a gain, i think u did spice us up . maybe thats what we where missing ,

PH said...

"Point 7 : why I shouldn't use the word مشلاط ?"

It's considered siya3a, very unlady like :P.

"I am studying the same thing which make u sit down and analyze the post to come up with these notes :P"

I'm not studying any more :P, as for analyzing haven't even started yet those notes where off the top of my head as this topic is always brought up where ever I go, inside or outside Libya ;).
And to correct Bravehearts comment our accent is only cool with guys and the western accent is only cool with girls. I think ours is tougher, thicker and yours is softer, my two cents though.

salaam

dusk till dawn said...

salam sis

just to ask, u said مارشة- شرشور i think u meant مرش -شرشور
what ever part we come from libya we are proud to be part of it, even in uk parts they have diffrent phrases hard for other peoples to understand, two realy a mazed me and love are واركينا و دالونتى

Anonymous said...

to DTD u forget
قلعه عكاريه
المفوز السمافرو
المقطرن الكياس اى الطريق المعبد
زبط الجنه اعتقد البتيفور

Haia said...

السلام عليكم
كيف اخطر الموضوع عليك
مقارنة حلوا
وصحيت عليها

MusicLover said...

Very educational and anybody who is into Linguistics should read your post.


from the past, how is your friend who had marriage problems and the little boy in the hospital whom your wrote about.

Here is a camera you might consider purchasing which will not break your bank :-)

Canon PowerShot A480

http://www.washingtonpost.com/wp-dyn/content/article/2009/05/26/AR2009052602848.html

Weldemdina said...

great post, I really enjoyed reading it in this wet Saturday morning, it shows how big and rich in culture and you see that from different words which were adapted from different languages and mixed and fused in this melting pot and the result is a Libyan dialect, great work.
p.s I think the word : نلقانك the equivalent to it in the west side of libya is the word: تريتك

HEBA said...

انقنه البوست مش عادي.

لاحظت انكم استخدمتوا "لانقنك" و بعض الناس يقولوا " انقنك". لو ربطنها باللغة ، حنلقوا انها نوع من القسم لتتصديق على ما سيتبعها.

و على قصة المشاريب:
في طرابلس الغازي يسمى مشروب والطبيعي عصير.
أما في بنغازي ، الغازي يسمى "قازوزة" و غيره يتسمى مشروب.

إضافة :
وجبة الغذاء ، في الغرب تنطق " الغِدِى" بكسر الدال و تخفيفها. أما في الشرق تنطق " غَدَا".

و أيضاً نطق كلمة "هنا" تنطبق عليه نفس قواعد الـ " أنا"

هَنَا = هِنِى

فكرتيني بالبعيد .. سلام

LoveLyH said...

الشراقه يقولوا ياحيلاه
والطرابلسية يقولوا ياحليلي ، ،
رشته امبكبكه او مقطع
واحني نقولوا رشته برمه
عييالكم -< اهلكم او عيلتكم
>بلبول- سحنون<
سامت - صامت
نيين - ليـــــــــين
عبدالسلام - عبالسلام
كسيكسو ـــ كسكسى
دروحني- زعميتك
نرجي - نراجي
عماهم - معاهم
المواس - الماوس
خوية- خوي
بعد خطرها - علي فكره
هضا.هضاى - هدا
يحرقن فيا- يحرقوا فيا
اللوزات - اللوزتين

hatem said...

السلام عليكم يا عرب سياتل كيف حالكم ان شاء الله طيبين
قاموس مش عادي بكل صحيتي عليه حق والله ما بعدنا من بعضنا واحنا في نفس البلاد سبحان الله بس الواحد مفروض يبدا يكتشف لهجات بلاده
صحيتي مرة تانية على القاموس الملخص انا بنطبعه ونخليه معاي ماحدش يعرف الظروف

Anonymous said...

لانقنا جوك جو مش عادي بكل(بكسر الباء والكاف)لانقنك منورة

Benghazi Citizen said...

مرحبا
اولا شكرا عل المعايدة ,,,سعدت انه في من تفكر
ثانيا موضوع (نزيك) بكل,عجبني
و ثالث اتمنى أخبارك تمام صديقتي
تحياتي لك و للجميع

R.F.H said...

This is my first time being in your blog.
you have such a unique style, good luck in your exam.

R.F.H said...

I really liked your translation. so funny.lol. good luck again.

elekomm - إليكــم said...

السلام عليكم

بصراحة اعجبتني التدوينة وكان التعليق عليها من اكثر ما شاهدت

أضف أيضا كلمة ( اهني )=( الواحد )مثلا الشرقاوي عندما يصف شئ معين يقول(الهني) والغرباوي يقول ( الواحد )..

~ ~ ~ ~ تحياتي